B9 վիտամինը կանխարգելում է աուտիզմը

Վիտամին B9 (ֆոլաթթու) պարունակող սննդային հավելումների ընդունումը մինչ հղիությունը և հղիության ժամանակ, վաղ շրջանում նվազեցնում է երեխաների մոտ աուտիզմի զարգացումը 40%-ով, հաղորդում են լայնածավալ հետազոտությունների հեղինակները:

«Այս արդյունքները հաստատում են նախորդ հետազոտությունները, որոնք ուղղված էին երեխաների ուղեղի զարգացման համար ֆոլաթթվի նշանակության և աուտիզմի կանխարգելման ուսումնասիրմանը»,- ասել է Նյու Յորքի Կալիֆոռնիական համալսարանի դոկտոր, պրոֆեսոր Էզրա Սասերը: 

Միջազգային հետազոտությունները կատարվել են Նորվեգիայում 2002-2008թթ. ընթացքում ծնված 85 000 երեխաների մասնակցությամբ: Նրանց մայրերը խմբերի էին բաժանվել ըստ հղիության ժամանակ B₉ վիտամինն ընդունելու կամ չընդունելու սկզբունքով:

Բացահայտվել է, որ ֆոլաթթվի (B₉ վիտամին) անբավարարությունը հղիության ժամանակ նշանակալիորեն բարձրացնում է սաղմի նյարդային համակարգի զարգացման արատների ռիսկը:

Վերջին տարիներին  հետազոտություններ են կատարվել նաև պտղի գլխուղեղի և ողնուղեղի զարգացման վրա  B₉  վիտամինի այլ դրական արդյունքները հայտնաբերելու ուղղությամբ: 2011թ-ին նորից Նորվեգիայում այդ նույն խմբերի հետ կատարված հետազոտությունները ցույց են տվել, որ այն երեխաների մոտ, ում մայրերը հղիության վաղ շրջանում ֆոլաթթվի լրացուցիչ չափաքանակ են ընդունել, կրկնակի անգամ նվազել է երեք տարեկանում խոսքի զարգացման խանգարումների ռիսկը:

2011թ-ին Կալիֆոռնիայի համալսարանում կատարված համանման փորձերը ցույց են տվել, որ այն երեխաների մոտ, ում մայրերը հղիության վաղ շրջանում բազմավիտամինների և հանքանյութերի համալիրներ են ընդունել, այդ թվում և ֆոլաթթվի, աուտիզմի զարգացման ռիսկը շատ է նվազել: Նույն երևույթը արձանագրվել է նաև այն մայրերի երեխաների մոտ, ովքեր B₉ վիտամին են ընդունել 4-8 շաբաթական հղիության ընթացքում:

Հիշեցնենք, որ ֆոլաթթուն անհրաժեշտ է ԴՆԹ սինթեզի համար նաև օրգանիզմի վերականգնման գործընթացում: B₉ վիտամինը ձևավորվում է բնական ճանապարհով ֆոլաթթվից, որը առատորեն կա կանաչ տերևով բանջարեղենի, ոլոռի, ոսպի, լոբու և ձվի մեջ:    

Հարցեր, պատասխաններ, մեկնաբանություններ